Dä folgende Tex reech sich an all de Jecke en der fünfte Johreszigg en Kölle. Nevve Obergärigem un Bützcher es der Fastelovend en äänze Tradition.

Wat es Fastelovend?

Der Fastelovend es e groß Fess. Dat Wood „Fastelovend“ kütt vun „faaste“ (fasten). Dat Wood „Karneval“ (lat. carne vale) bedügg „Fleisch lebe wohl“.

Der Fastelovend fängk en der Haupsaach op Neujohr aan un end am Äschermeddwoch. Eigentlich geiht et ävver ald am 11.11. öm 11 Uhr 11 loss. Die dolle Dag doore vun Wieverfastelovend bes Veilchendinsdag; der Höhepunk es der Rusemondag. Mer sprich vun der “fünfte Johreszigg”.

En Kölle regeet zick 1823 et Dreigesteen: Prinz, Buur un Jungfrau, wobei der Prinz aanfangs “Held Karneval” heeß. Anderswo regeere Prinz un Prinzessin.

Woher kütt dä Bruch?

Ald vör 5000 Johr däte em aale Mesopotamie ärm un riche Lück zosamme Feste fiere. De Römer un de Greeche han op ehr Gödder Dionysos un Saturn gedrunke, de Kelte un de Germane däte der Winter met gruselige Maske verdrieve. De Kirch wor nit begeistert, ävver dat wor de Minsche egal. Se däte wigger fiere.

Em Meddelalder däte der Adel un de riche Bürger op der Stroß fiere, späder gov et ne Zog. Zick dem 12. Johrhundert es Fastlovend e chresslich Fess, denn am Äschermeddwoch fängk de Faastezigg aan, die veezig Dag duurt un mem Osterfess end. Vürher dun de Minsche noch ens richtig fiere.

De Franzuse hatte en der Besatzungszigg vun 1794 bes 1814 nix gäge dat Fess un de Preuße, die donoh regeete, woodte vun de Minsche ignoriert.

Wie läuf dat an Fastelovend?

Hügg fiere de Minsche op der Stroß un op Sitzunge, denne ne Elferrod met enem Präsident an der Spetz vürsteiht. Em Fastelovend weed de staatliche un städtische Oodnung usser Kraff gesetz. En Büttenrede weed de Politik kritiseet un de Politiker krige der Speegel vürgehalde.

Der Stroßekarneval weed op der Stroß un en der Weetschaff gefiert. De Lück dun sich verkleide, manche traditionell als Metgleeder en einem vun dä mih wie 100 Traditionsgesellschafte en Kölle, andere looßen ehrer Phantasie freie Lauf.

Fastelovend steiht jedes Johr unger nem bestemmte Motto. En Kölle heißt et dis Johr "Et Hätz schleiht em Veedel". Der Höhepunk vum Fess es der Rusemondagszog met singe Motivwage, met denne op Messständ en Politik un Gesellschaff op frech-ironische Aat hingewese weed.